شانلى توركجه ميز
هر گون خييابانى نوطوق سؤيله يير
آرزيسين٬ آمالين هئى بيان ائدير!
توركجه دانيشيردى٬ فصاحت ايله
وارلى توركجه ميزده بلاغت ايله
دينله يه نلر بوتون حئيران اولوردو
عجم حناسينين رنگى سولوردو
گؤزه ل دانيشيردى توركجه ميزى او
اوجاباش ائديردى هر گون بيزى او
كؤنلو ده٬ ديلى ده مالييدى ائلين
دوز اؤولاد اونودماز٬ دانماز اؤز ديلين
قييام قالديرميشدى شانلى توركجه ميز
ايميردى تئهران'ا قهرمان تبريز
تئهران'ى اؤزونه ايديره جكدير
آتلانيب تئهران'ا او گئجه جكدير
تضييقلره معروض قالميش ديليميز
باطيل جايناغيندا اسير ائليميز
چيچكله نير ايندى٬ گولوردو ايندى
احسن دئيه نلر٬ اون يوخ٬ يوز يوخ٬ ميندى
او هر گون تبريز'ده بير نوطق ائديردى
مجليسه "رفعت"له بيرگه گئديردى
ده ييشيردى خالقين معنويياتين
هر گون حيسس ائديردى سسين حياتين
"معنوى تحووول گره ك ميللته
توپلانين!" دئييردى هر گون اوممته
بليغ ناطيق ايدى٬ فصيح بير خطيب
توركجه-فارسجا يازابيله ن بير اديب
بيرينجى نوطقونده اوپورتونيزمى
ايفشا ائتدى درين فيلوسوف كيمى
بيرليكدن دانيشدى ايكينجى گونده
ايتتيحاد قوخوردو اونون سؤزونده
"ميللى حاكيمييت" اوچونجو ميصداق
اولموشدو نوطقونا٬ اونون سن بير باخ
نه دئيير؟ "خاييندير" دئيير ميللته
"پول ايله سئچيله ن هر نوماينده"
"راى٬ پولاد قولودور ميللتيميزين
دوراجاق باشيندا دؤولتيميزين!
ميللى حاكيمييت عظمتليدير
بو قودرت٬ بو عيززت چوخ هئيبتليدير"
باشقا بير نوطقونده دئدى "ائل! اؤيون!"
ائل ايراده سيندن دانيشدى اوگون
"ميللت موولودودور" دئدى حؤكومت
"اونا گؤره حاكيم اولمالى ميللت"
دئدى "جماعت بير معلوم قوووه دير
كيم دئيير آنونيم بير مجهوله دير؟"
"تئهران قورخاجاقدير بيزدن اوگون كى
اوندان حئساب چكيب دئيه ك بسى هانى؟"
"بيز ايلكجه تبريزى٬ آذربايجانى
سونرا دا تئهرانى٬ بوتون ايرانى
تجددوده سارى سووق وئره ريك
ايران'ا امنييت بيز گتيره ريك"
0 Comments:
Post a Comment
<< Home